السكوت أحياناً أحنّ من ألف كلام

ماريا أبو عبيد – السودان:

في زمن الكلام الكتير

بقى السكوت غريب

وبقى الزول الساكت متّهم

يا إمّا ضعيف يا إمّا ما عندو رد

لكن الحقيقة مختلفة تماماً

السكوت مرات ما بيكون هروب، بيكون اختيار.

اختيار إنك تحافظ على نفسك، وعلى قلبك، وعلى وجعك من إنو يتبعثر في كلام ما حيغير حاجة.

في مواقف كتيرة الكلام ما بعالج بل بفتح جروح جديدة.

تشرح، تبرر، تعيد وتزيد،وفي الآخر تلقى نفسك تعبان أكتر من الأول.

عشان كده السكوت بيجي أحنّ… أحنّ على النفس من محاولات الفهم القسري وأحنّ من انتظار اعتذار ما حيجي.

السكوت ما معناهو إنك ما متألم بالعكس أحياناً بيكون دليل إن الوجع كبر لدرجة ما بقى عندو صوت.

في ناس لو حكيت ليهم ما بيسمعوك ولو فضفضت يستخدموا كلامك ضدك.

هنا السكوت بيبقى أمان… مساحة صغيرة تحتمي فيها من خيبات أكبر.

وبرضو السكوت ما دايماً ضعف ، في لحظات بيكون قمة القوة.

القوة إنك ما تنجرّ لمعارك فارغة ولا تثبت حاجة لزول ما ناوي يقتنع ،تسكت وتمشي وتخلّي الأيام تشرح بدلك.

يمكن أصعب سكوت هو السكوت مع الناس البتحبهم.

لما تختار ما تتكلم عشان ما تخسرهم أو عشان ما تكبر المسافة بينكم.

هنا السكوت مؤلم، لكن أحنّ من كلمة ممكن تكسر شي ما بتعرف تصلحو تاني.

وأخيراً

ما كل السكوت هزيمة وما كل الكلام شجاعة، في أوقات السكوت أحنّ من ألف كلام… لأنو ببساطة في وجع ما بنحكيهو بنعيشو وبس.