كانـ(t) في المريخ!!

فاطي سطر
محمد عبد الماجد
في اللغة الإنجليزية، يقال إنّ الحرف “t” يشير بشكل أساسي إلى صوت انفجاري لثوي غير مسموع (مثل “ت” في “table”).
غايتو أنا ما عارف، لكن فجأة كدا سمعنا لينا صوت انفجاري غير مسموع.
ناس قالوا مُسيرة.
وناس قالوا ميج.
وناس قالوا صاقعة.
وناس قالوا مصنع الشفاء ضربوه تاني!!
وناس عارفين أي حاجة ـ شنباتهم متل كوم القش ـ قالوا دا الجنا البقولوا ليه موسى حسين كانتي قطع الزلط.
قلنا ليهم (قطع الزلط) بعمل كل هذا؟ الزول دا قطع الزلط بي مركب؟
عندنا عمنا التيكم ود الكجم الكمونجاني لمن كبر بقى يجيب كلام بره رأسو.. مرة يجيب أم بي سى ومرة يجيب لينا إذاعة الوحدة الوطنية.
بالمناسبة هو في إذاعة بالاسم دا؟
المهم مرة يشتغل لينا (دكان ود البصير) ومرة (صور شعبية)، الأيامات دي شغال لينا (عالم الرياضة)… عمنا علق في كانتي.. قرينا زول شفت.. قال عمنا دا ما علق، عمنا دا العليقي عديل.
مريخابي سمع بي موضوع كانتي دا جاء واقع كاضم.. جرينا بيه على الدكتور ـ دخلوه الطوارئ طوالي.. الدكتور عاين ليه كدا ـ طلع النضارة ورجعها تاني، قال ليه والله إنت يا حاج ما عندك أي حاجة؟
صاحبنا قال ليه عاد كيف يا دكتور ما عندي حاجة، وأنا المروحة المدورة فوق رأسنا دي شايفها متل (المجروس).
مريخابي آخر، قال تاني لا بيأكل، سمك لا لحمة لا فراخ.. عدس بس.
قلنا ليه علاقة السمك واللحمة والفراخ بي كانتي شنو؟
قال لينا دي ما حالة نأكل فيها سمك أو لحمة أو فراخ.. عدس بس.
يمين مع العليقي دا تاني (العدس) ما تلموا فيه يا مريخاب.
كانتي كان في المريخ.
كانـ(t) في المريخ!!
وقعت ليكم والّلا (أطبنجها) ليكم.
عندنا قريبنا وقعت فيه صاقعة.. بعد تسع أيام الذاكرة رجعت ليه.. أول حاجة سأل منها.. قال لينا طبنجة وين؟
نحن طوالي قلنا أمك.. الشبكة فل.