قصيدة : يــا بـلادي

عـــــود مــــرا
قصيدة : يــا بــلادي
الشاعرة :سعــــادة عبدالرحمـــن ابراهيــم

يـابـلادي
أول القـول والتبـادي
كامـل الاهليـة انـي
بكـل ارادتـي واعـتدادي…
افتخـر بـي انـي منـك
وانحسـب ذرة ف ترابـك
وامشـي بيـن النـاس وانـادي : …
انا سوداني 🇸🇩
وابـاهـي
بـي كرامتي وبالمبـادئ…
يابـلادي….
يـابلـد زي كنهـو مافي…
لابطـون الارض جـابـت
لا المفـازات لا المنـافـي …
التنـوع في الثقـافـات والتعـدد
والديانات لاتشدد…
تلقى في سحناتنا ضـافـي..

ائتـلافنا مـن اختـلافـنا…..
واخـتلافنـا سـر ائتلافنـا
كيف تختلف المضـارب
والتفاصـيل والمـآرب
دمـنا الفي عروقـنا سـارب
ببقـى اخـرتنا ومطافـنا…

احنـا محـتاجـين توافـق
بيـن مشـاربنا وبـنودنـا…
واي زول للاخـر يقبـل
ائتلَفنــا ام اختلفـنا
ضلنـا الواحـد حـدودنا
وديـة بالآخـر بقـودنا
لانزوح لاهجـرة
لاقبليـة بتشـتت جَـهودنا..
المزارع يفلـح ارضـو
المسـاهـر يحمـي عِـرضـو
البيعلـم والبيبـني
وبعـرف التاريخ جـدونـا

وكل زول بالتـاني يمـسك
شان نعـدي
شدوا ساعـد الوحـدة لازم
ودة التحـدي…
هات ادينـك وهـاكا يـدي ..
شـان نعـدي.
قالـد النخـل الهشـابة
والسنـط حضـن التبـلدي..

يابلــد فـي حجمـو قـارة…
في الشـدايد وافي خـيرو
ولا الدرت دسالـو فـارة…
حتـى طيـرو، والهجـر لي عشـو
برجـع …
لافـي زيـو
لابديل في الدنيـا غيـرو
ولسـة ضرع سعيتـو دارة…

يلا نحتفـي بي تراثنـا …
وبـي ثـقافاتـنا وغِـراسنا
حافـظ التـاريخ سيـرنا
وفي المحافل علي راسنا
ولابديل للوحدة ساسنا
وفي اساسنا
نحن من كبد المواجع
والشدايد كان مراسنا