الناس في شنو وبتوع التمهيدي في شنو؟

فاطي سطر
محمد عبد الماجد

فجأة كدا لقيت ليك إعلام المريخ نفسه قائم، الأعزاء في صحيفة (الصفوة) اعترضوا، والأعزاء في (الرد كاسل) عاملين ضجة.. وما عارف ناس (نادينا) و(مريخابي) عملوا شنو؟
من طلعوا من التمهيدي نحن في الحالة دي.
قلت في شنو؟ هل ظهر (قاصر) جديد في الهلال؟
روفا جاب الخامس؟
تتخيّلوا الزعل في شنو؟
قالوا الموقع الرسمي للهلال عمل ربكة لأنه لم يعلن عن أن مباراة الهلال وإي سي كيجالي (ودية)، مع أنّ الصفحة الرسمية لنادي إي سي كيجالي أعلنت عن ذلك، وكذلك فعل الاتحاد الرواندي، والكثير من صفحات ومواقع الهلال نقلت ذلك وتحدثت عن أن المباراة (ودية)، وهنالك جهات في الهلال هاجمت تماطل الاتحاد السوداني الذي تسبّب في ذلك الأمر ـ لكن الإخوة في المريخ تركوا كل ذلك وقالوا كيف للهلال أن لا يعلن عن ذلك.
خلوا الحرب وقبّلوا على الهلال.
الهلال طبعاً عنده تقديرات، بتوع التمهيدي ديل ما فهموها لينا ولا بتقع ليهم ـ دي حاجات كبيرة عليهم.
قول الهلال عدم موضوع كدا ـ أو حتى قلة أدب ساكت لم يعلن عن أن المباراة ودية ـ المشكلة شنو؟
يا ربي اتحاد سيكافا يمكن أن يبعد الهلال من سيكافا القادمة؟ يا ربي الفيفا يمكن أن تعاقب الهلال وتبعده عن دوري أبطال أفريقيا؟
إنتوا يا ناس المريخ لعبتوا مع فريق هواة في ليبيا وقلتوا نجوم الدوري في بنغازي في زول سألكم؟
وقبل ذلك انسحبتوا من أمام الهلال بعد الأربعة، في زول حاسبكم؟
حليتوا في المركز السادس في الدوري الموريتاني، في زول شاغلكم؟
طلعتوا من التمهيدي الأول وقلتوا الفريق في مرحلة بناء، في زول قال حاجة؟
شاركتوا في دوري الدرجة الأولى في بربر، في زول اعترض…؟
لبستوا كريمي وكل مرة عاصرين على اللونين الأبيض والأزرق، في زول قال شئ؟ وما قصدكم من اللون الكريمي إلي التشبه بالهلال.
يعني بقت على (ودية) الهلال.. إن شاء الله (الودية) تبقى ليكم (كأس جوي).
غايتو الزول وقت يطلع من التمهيدي، ببقي يتصرف تصرفات غريبة، وبقول كلام ما بتعقل.
الناس ديل (ناس الرد كاسل) عندما خرج المريخ من التمهيدي كان عنوانهم الرئيسي (نتيجة منطقية وخروج رغم الأفضلية) وعندنا لم يعلن الهلال عن مباراة ودية كان عنوانها الرئيس (الهلال يربك المشهد الرواندي بالمعلومات المضللة).
الناس ديل بلخبطوا بين المنطق والربكة.
المباراة ودية، والاتحاد الرواندي حدد ذلك وهي الجهة المنظمة، تأثير المعلومات المضللة من الهلال على المشهد الرواندي شنو؟
كان ممكن تتحدثوا عن إرباك المشهد السوداني، لكن إرباك المشهد الرواندي الهلال ما عندهُ أي علاقة بيهو.
أنا ما عارف (جازكم) دا جايبنو من وين؟
أكيد فيه حاجة!!
إنتوا بتكبوا من وين؟
راجعوا الطرمبة، في حاجة غلط..!