تعمــير
حكــاوي أحــلام العٓـودة _ سعادة عبدالرحمن إبراهيم
اليوم صحيت بدري (شيَّكـت) على لوازم حَـلَّة (السخينة)*١ من بصل ودكوة وبعض التحبيشات امعانا في الكرم، طماطم زيادة وفلفلية جات من الجيران وبصراحة تركتها في ذمة البنات شاطرات فيها لسن مثلي.
الشباب اكلتهم عدس يومين حسيت بالتراخي بدا يتسلل الى همتهم، واكاد المح بعض الاحلام الباهتة في اعينهم بما لا استطيع! ( كِسْـرة قُـرَّاصة عصِيدة)*٢ فقلت الحقهم فاكرمهم ب(السخينة).
بايتين في بيت ناس (حمدو) سيد الغنية مجموعة من الشباب جونا من مدني وشباب كانوا واسرهم ضيوفنا بالحي ايام الشدة، جونا من (ودنوباوي)* (وابروف)*٣ غمرونا بجو من الدفء والاحساس الجميل الذي لم تطمسه اصوات القصف و الدانات والرصاص هنا وهناك عز ازمتنا وشدتنا كنا نتفقد من حولنا ونغوص بنظراتنا بأعينهم كأنما نغرس الطمأنينة ونربت علي القلوب الوجلة لنطمئنها، واول مايهدأ صوت القصف تتعالى أصوات الجيران ينادون على بعضهم، وأهم سؤال( الضرب دة وين؟) ودايما الإجابة تكون : (شكلو قريب) (تعالوا يا اولاد ماتمرقوا) (فلان وين وعلان وين وعلان وين؟)، هذيان هذيان؛ ثم ترجع الحياة رويدا رويدا، وتتداول الاخبار كما تسري النار بالهشيم عن موقع القصف وضحاياه..ايام تنذكر ولاتنعاد.
جونا امس الشباب ديل عشان يبنوا معانا الحيطة البينا وبين ناس( فتحية بت محمد احمد) كنا فتحناها لتسهيل الحركة بين البيوت ايام الشدة، كنت أسعدهم بهذا (النفّٓـاج)*٤😍 مرة مرة بعد ما اضع حلة العدس بالنار اتسرق (بالنفّٓــاج) علي خالتي فتحية بلقى عندها الكسرة بايتة ان شاء الله بي موية _كان ماف شي بايت _ اخير من عدسي دة.
وتنادي الضهر للجَـبَـنة بعلو صوتها، ومايحتاج؛ لان ريحة (القلوة) تدق ناقوسا يؤذن فيهزم كل همة وتلين له العزمات، ويندى له الجبين؛ فاضطررنا ان نوسع الماعون ونشارك بزيادة حصة البن والسكر لينعم الجميع بنصيبه منها، واُقحمت فترة استراحة (الجبنة)*٥ ضمن برنامجنا اليومي عنوة _ اراها_ ولكن لان الشباب من يشموا ريحة البن يرخموا وتسقط ايديهم وتظهر علي عيونهم نظرة تسول علنا ( كباية جبنة).
( لولة) اختي و(زينب) بت خالتي فتحية مرات يزيدوا القهوة موية؛ ويطمسوا احيانا هويتها فلا هي قهوة ولاهي قهوة عندما يكتر الطلب عليها! ويسمونه (التِني) بكسر التاء والنون ويعني التاني ، وبالرغم من ذلك اسمع كلمات الثناء من هنا وهناك :(جبنة فاهمة)!! احترت طبعا!! المهم؛ ومع اني لست ممن يعشقون القهوة خاصة وانها تزعزع نومي بالليل الا اني قد ادمنتها مؤخرا، ادمنتها كطقس ولمة محبة ولحظة تنتظرها النفوس في تراخي وخدر وترقب بعد وجبة الفطور (المَدَنّْْكـلة) بوش، عدس، سخينة؛ ودايما التحلية شاييني بصفق الليمون الذي لايعلو عليه_ او هكذا اراه_ مع انو مافي زول شكروا لي وبعد اي وجبة، مع انو حاجة آمنة لقتني بقطع صفق الليمون الأخضر المفرهد من شجرتم الرامية جمب بيتنا؛ فاظنها و من نظراتها لاتعجبها الفكرة!! فاصبحت رايحة جاية الدكان اقطف_ خلسة لاتراني _صفقتين اضعهم بالتلاجة للشاي.
اهاااا الدوام اليوم بشارعنا قصير؛ لانهم قرروا يمشوا شارع ناس عم ميرغني بهناك لاكمال بعض اعمال التعمير والبناء بالشارع الورانا. عارفين!! العدس الشاردين مِنو هنا! حايلاقيهم بالشارع التاني على الغداء؛ لاني شميت قدحة العدس من بيت ناس (عفاف بت عشة الناجي).
اضطر الشباب ايام الشدة انهم يزيلوا العريشة الفي شارعهم ( جراج العربية) لتسهيل مراقبة الطريق وخوفا من اندساس بعض اللصوص بها ليلا اونهارا غايتوا قالوا يشوفوا البقدرو عليه يعملوه لحين توفر الباقي، كمان عشان مايقولوا الشغل كلو في شارعنا بس، ونحنا عارفين والله في ناس من غير ذكر اسماء( راكوبتم) *6 دي واقعة طوولت ماعندها علاقة بالحرب لكن خشوا برنامج التعمير معانا، والتعمير للجميع شعارنا🤚.
اها ابالغ ليك عمك سعد قال ( ادبخانتم)(W. C) واقعة علاقتا بالحرب شنو ماعارفة؟؟ والشباب واحدين يطنطنوا واحدين يقٓـرِّقـوا ؛ الهادي وشباب من الحِـلة الورا و(يور) غايتو بدوا يحفروا، و الخرابة الجم ناس كجم دي حقوا نعمرا معانا بالمرة وهي قاعدة كدة من ايام السيول والامطار (1988) _قبل ان يولد الكتير من الشباب منهم الآن وكانت ملعب كورة للصغار عشان مايمشوا الميدان والشباب الكبار يطردوهم، المهم الخرابة بقت مركز لمناوبات الحراسة ليلا وينام فيها الوافدون الرجال والشباب من احياء ام درمان من الضيوف وابناء الحي،
المهم وصيت سحر وزينب يعوسوا الفطير حق العشاء وقريدة مكارم بتجي ترص وتوزع العشاء معاي وغسيل العدة اليوم توتة وعادلة وغادة بت حنينة حسب الجدول. وكلمتهم ما يجربوا لينا في العجين، البنات يجن يتشالقن للعواسة يخربن العجين امس ( لولة) اختي العجين كلووو خرتتو عجيينة بس.
وكلمت خالد ود (حنينة) يشوف طريقة اللبن، امس صلاح ودفتحية وفارس جابوا اللبن
محمد (كجم) وحمدو (سيد الغنية) قااالوا بيدقوا في الطوب الاخدر ومرات نحرش عليهم الهادي اخوي لمن يرطبوا تحت النيمة ويشغلوا الامبسري ويختوا السَّـفة*٧ تاني شغل مافي.
وانا طبعا الشباب بيطلبوا مني القربى دايما عاوزين يكونوا في وردية حمدو (سيد الغنية) لاني اغدق عليهم واعمل ماشايفة تجاوزاتهم وبعدين بخصهم بالجبنة البِـكر (الأولي) وبالليل بخصص ليهم مع الفطير لبن صافي قبل ناس (هبو) و(لولة) يزيدنوا موية؛ وكل يوم يدعوا علي سيد اللبن ( المسكين) الغشاش.
(يور) امس جاب بلاغات فحواها انو محمد وعمر التِـر وفارس ود أحكام؛ انها فطرتم عصيدة وتقلية ودة بجيب مشاكل لان الشباب حايخلونا ويمشوا محل العصيدة وملاح الروب والتقلية وحايعلوا سقفهم.
مع اني اليوم بايعة القضية (علي ابو نار) زميلي من ايام الثانوي بدأنا نقول الشعر بالمرحلة الثانوية مدرسة الاميرية ام درمان من التسعينات لم نلتقي، فقرأ مناشدتي بالفيس مين يعزمني كسرة بي نعيمية؛ واصلا طالباهو ليها من ايام ثانوي وما حبيت اكون لحوحة واحرجوا واخيرا قرر يدعوني عل فطور نعيمية بي رهيفة وللتداول حول مشروع (تعمير).
طبعا بيني وبينكم انا في ادارة المشروع دة (تعمير) حاسمة جدا وبتعامل مع البلاغات كلها بحسم
امس مثلا (يور) ابلغ انو ناس ( هبو) بت حنينة ولولة اختي و(زينب) و(سحر) عاملين جبنة ومشغلين (الجبلية) ودة ممنوع في مؤسسة (تعمير) .
وبالنسبة لي حصتي( الدرس) بالدار اليوم فقد اوكلتها سداد دين لأستاذ (صبري) لأني سديت ليهو حصة أول امس.
لكن انا اليوم أول حاجة عملتها وريت ( يور) اني ماشة عزاء بامبدة عليه مراقبة الأجواء وسير العمل
وانا ذاهبة سرا الى (النعيمية) و(الرهيفة).
انتهى
١/ السخينة اكلة سودانية قوامها البصل والطماطم وزبدة الفول السوداني (دكوة).
٢/ القراصة والكِـسرة والعصيدة تقوم مقام الخبز عند السودانيين وتختلف حسب المناطق.
٣/ ود نوباوي وأبروف من أحياء مدينة أم درمان العريقة
٤/ النفّٓـاج عرف سوداني قديم، باب يفتح بين البيوت تنفذ عبره الحريم خاصة الى الجيران.
٥/الجَبَنَة : بفتح الحروف الثلاثة هي القهوة عند السودانيين.
٦/راكوبة: عريشة من الخوص والقش والحصير للمقيل بالبيوت السودانية
٧/ السَّـفة: نوع من المكيفات ( صَعُـود) يخزّن مثل القات اليمني.