الخرطوم حترجع

 

إسحق الحلنقي

أبشرو الخرطوم حترجع

بيها كل الدنيا تسمع

ينهزم صوت البنادق

ويبقى صوت قمريه تسجع

——

أرضها الخرطوم عظيمة

في جديدة وفي قديمة

تعجبك قوة وعزيمة

شعب ما عرف الهزيمة

إيد بتذرع وسيف بيقطع

—–

أسأل التاريخ عليها

المبادئ الراسخة فيها

الشمس ما بين إيديها

والقمر خلقوهو ليها

قاشا يجري ونيلا يلمع

—–

المدارس بكره تفتح

والمزارع خيرها يطرح

والمصانع صوتا يصدح

الأزاهر تبقى أسمح

تبقى أجمل وتبقى أسمح

——

تعجبك فيها الأصالة

الرجال صامدين رجالة

الأدب والفن رسالة

والدهب حبات رمالا

وكل يوم خيرات بتطلع