تحت التنفيذ
مقتطفات الجمعة
*** مشروع تشجير المدراس نتيجته نسمة، وظل، وثمرة وليت المشروع خرج إلى الشوارع والبيوت وحول ( اليابس ) أخضرا
( والخضرة متاع العيون )
*** ( عيب السواد ) على منتخب سيدات السودان صديق ورفيق وشقيق الهزائم ( اللوم اللوم ) على ( حريمنا ) بهذا المظهر الباهت ( ولوم الشووم ) على الاتحاد العام الذي أسقطنا ( رجال ونسوان )
*** في بلادي وبشكل عام ( التجارة غير تراضي ) والسوق السوداني ( تخنق فطس ) والسلع إن لم تكن ( بالسوق الأسود ) تباع ( بالسعر الأسود ) سواد ليل ( بلا كهرباء )
*** كلمة ( سمح ) بالموافقة أو الاستجابة ( سمحة ) وكانت ( سمحة شديد ) في لسان أمهاتنا وحبوباتنا
( وسمح الزول السمح )
*** من ( سنة عشرين ) وإلى ( 26 ) والهلال بطل للدوري وبهذا قطع ( 60% ) من مشروعه السيادي ( عشرين / تلاتين ) ليواصل مشروع ( 30 / 40 ) والتأكيد المشروع ( لو كتل ليهو زول ) في الاتجاه المعاكس
( حيكتل ناس كتار )
*** من مرقنا من البلد ولحدي ما دخلنا أمدرمان والارتكازات مالية الشارع والله والله يا شدرابي ود خيتي ست الجيل في كل ارتكاز السواق يدفع ومسكين قال بيدفع ببنكك باسم أفراد يعني القروش ما داخلة للحيكومة ودي سرقة عديل ..
ديل يا بت أحمد ناس بلا أخلاق بلا ضمير بت أحمد ربنا يحفظك ويملأ جوفك صحة وعافية
*** غادر القاهرة إلى الخرطوم أربعة من ( أرباع الفنانين ) يعني من ( مقلدي المقلدين ) كما غادرتها ثلاث ( قونات ) والناتج لا القاهرة خسرت ولا الخرطوم كسبت
( وياحليل زمن الفن الجميل )
*** كم من ( زحمة ) مليانة ( رحمة ) وأكثر من تجمع لأهل الهلال جرى الأسبوع الماضي شاركت في بعضها وحرمتني ظروفي من بعضها الآخر وما أجمل ( اللمة والملمات ) والبعيد من الحبان حي ميت ( جلابيتو كفنو )
*** اللافت في مباريات كأس العالم أن النتائج الأفضل للمنتخبات التي ترتدي الأزرق والمشهد أن الأهلة ( نسوا الانتصار ) واخوتنا المريخاب ( يعيشون الهزيمة ) كلما ( شاهدوا اللون ) تحت صوت الفنان حسن عطية
( كان انت نسيت أنا ما نسيت )
*** علي الطلاق بالتلاتة أنا سنتين في القاهرة ما غبت فيها شهر واحد من المستشفيات والدكاترة .. ورجعت السودان لي خمسة شهور .. شايل أدوية تلاتة شهور .. علي الحرام مما جيت ما بلعت حبة واحدة وصحتي زي البمب .. يا ناس أرجعوا بلدكم واتموا صحتا وصحتكم . .
هذه رسالة صوتية أو فلنقل ( وصية ) جاءتني من صديقي الحبيب عميد م/علي تاج السر أضعها ( تحت التنفيذ )
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً ..
جمعة مباركة وكل جمعة وانتو طيبين
عبدالمنعم شجرابي ..