خطرفات
*سامي دفع الله إبراهيم
– الحمد لله الحمد لله الذي بلُطفه تنكشِف الشدائد وبالتوكُّل عليه يندفعُ كيدُ كل كائِد.
– إذا ما شئت في الدارين تسعد
فأكثر من الصلاة على محمد ﷺ
– على ماذا إتفقنا يا فُؤادي ؟
إذا ضاقت عليك فمن تنادي
تنادي الله خلّاق البرايا تنادي
تنادي من ينادي *“ياعِبادي”*
– الصواريخ نازله في إسرائيل والغريبة الكهرباء شغااااالة.. ماقطعت نحن تنزل مطرة يقطعوها أسبوع.. يعني إسرائيل دي ماعندهم محطه أم دباكر بتطلع من الخدمة؟
هنا ناس الكهرباء إذا سمعوا ساي في مسيرة ضربت في حتة ..في ٦ ولايات عدسهم الفي التلاجة باظ
– ريحه بخور *الوجعة* مامحتاجة جمرة عشان تفووح..
ربنا ينقذ السودان من أبنائه
– في الحوارات الرومانسية العالمية
حين تقول لك:
*بالنسبة لي*
هنا تقول لها:
*تنتهي عندي وجهة نظر العالم*
*الترجمه السودانيه*
اسمع هنا ياراجل
ماتقول لي فلان ولا جن
ماعملت الحاجه دي ماتجي داخل البيت دا
– اتخيل دول العالم دي حكموها *نسوان* ماكان حيكون في أي حروب.. حيكون في دول متخاصمة.. بس مابتتكلم مع بعض ..
– بحاول اتخيل صدمة يأجوج ومأجوج لما يطلعوا عشان يفسدوا في الأرض ويشوفوا العملوا الدعم السريع
– السودانيين يموتون في العشرين أوالثلاثين ويدفنون في الستين أو السبعين
– سماع دوي انفجارات في مدينة نيالا وخرج مستشار الدعم السريع بتصريح يرجح أنها: (باغات شربوت انفجرت)
– تمشي لناس زيارة يجيبوا ليك *كركدي* يجي بعدك ضيف تاني يقدموا ليهو عصير *مشكل* ياربي يكون *الكركدي* انتهي؟
– نحن حاليا عدينا مرحلة *المليونير* الي مرحلة *المديونير*
– كُلُّنا أسوأُ مما نبدو..ولكنَّه رداءٌ من اللهِ اسمه السِّتر..
*يا ربِّ لا ترفعْ عنَّا سِترك*
– واحد سألوهو متين تعرف إنك كبرت ؟
قال *لمن تقِلّ ردود فعلك وتصبح زول مرن*
طبعا أنا كنت قاعد جمبو وكنت جاهز إني أقول سنوني اتكسرت وشيبته وجلحته ونظري انتهى..
الكويس ماسألني أنا اول..
طبعا لمن جاء دوري طوالي صلحت النظارة وقته ليهو: *انا زيو*
– وهَذَا اللّيلُ أوسَعَني حَنينًا
فَمَزّقَ ما تَبَقّى مِنْ ثَبَاتِي
تَلُوحُ الذّكرَياتُ بِكُلَّ دَربٍ
لِأَهرُبَ مِنْ شَتَاتِي لِلشّتاتِ
ومَابٍي غيرُ شوقٍ لا يُداوى
وبَعضُ الشّوقِ أَشبَهُ بِالمَمَاتِ
– في الحرب دي النازحين ديل صورهم الفي الرقم الوطني بقت تشبه صورتهم في الحقيقه
جرب خت الرقم الوطني بتاعك واقيف قدام المرايا.. شبه عجيب
ناس السجل المدني ديل كان عندهم بعد نظر فعلا ..
– *سؤال*:
ليه الغزالة رمز للأنوثة والجمال
البقرة دي مالها ؟
مابيضاء وسمينة وعيونها كبااار
– *يقال* أن ظهور الكرشة عند الرجال من علامات الزواج الناجح.. وإذا بدت الكرشة تختفي دا معناتو في تخطيط لزواج تاني بس الظروف معاكساهو..
ماتكون قريت *يقال* *بقال*
دي حالة متاخرة شديد
– *حكمه عميييقة أوعي تقع فيها*
الأسود والنمور حيوانات لطيفة بعكس الدجاج والحمام حيوانات مفترسة ومن أخطر الحيوانات
*من وصية دودة لأبنائها*
نظرتنا للأشياء تختلف حسب تجربتنا وظروفنا
– (يمكن نمشي ويمكن مانمشي
واحتمال كبير مانمشي)..
دي طبعا بقولوها ليك لمن يكونوا ماشيين و مادايرين يسوقوك معاهم
– لمن زول يسالك أنت كيف فترد بي *تمام*
دا بختلف عن الحتشرح ليهو *تفاصيل التمام*
لأنو للمحبة مقامات
وأيضا القلوب أينما هوت احتوت
والروح عندما تصغي تبصر
والمشاعر حينما تزهر تبهر
– الخرطوم نضييييفة عقبال ما تنضف قلوبكم..النصيحة والكلم الفصيحة..
*دي قونه بتغني*
– لمن تجيني رسالة صوتية بسمعها أول ولمن أجي أرد عليها بسمعها تاني وبعد أرد بسمع الرد حقي تاني عشان أشوف رديت على المطلوب ولا نسيت.. وبرجع أسمع الرسالة الجاتني تاني قبل أرسل رسالتي..
*الموضوع بقي مرهق شديد*
– (واجيك راكب فوق دحييشا لي
يعرعر بي يفنجط بي
يكتتح فوق بنات الحي
بريدك والله عالم بي)
*مثال لأغاني هذه الايام*
– مافي حاجة بتسوي زي راحة *المال*
– لمن تكتب بوست في مواقع التواصل الاجتماعي
بتخش تقرا التعليقات
*تقول بتصحح في امتحان*
– كانت أعوام عديدة في عامين فقط (*الحرب*)
– أول ماترطب والقروش تبدا تكتر عندك بتجيك رسالة:
*ازيييييييييييك*
فيها قطر بتاع (يايات) شوفتوا الرساله الزي دي أوعي تردوا عليها.. وفي النوع البرسل ليك بقول ليك *اسمعني*
طوالي تقفل إضنينك اسمعني دا أخطر من إزيك
– الزول الغني أصاحبوا كتيريين
لكن الزول المفلس أصحابو حقيقيين
– في إيران قالوا المتعاون بربطوا في صاروخ وبسفروا..
هنا المتعاون: قول بااع قول مييع
– إِنَّ الشَجاعَةَ في القُلوبِ كَثيرَةٌ
وَوَجَدتُ شُجعانَ العُقولِ قَليلا
– مع قطع الكهرباء الكتير دة
طريقة عمل الموية الباردة:
(تاكل شكليت نعناع وتديها كوز موية
تحس في خشمك في مكيف اسبليت)
– لمن قلبك يغلط مرة عقلك حيعاقبك سنيين
– المغترب لمن يقول ليك رقم حسابك في بنكك كم؟
ياخ الجملة دي زي الأخدته ليك مسكن وأنت ضرسك بنتح في عيد الضحية
– نظافتك الشخصية في السخانة والحر وعدم الكهرباء دي
دا مابخصك أنت براك بقي بخصنا كلنا.. فياريت الناس تنكرش وتستحمي كويس وتتريح كمان ..
يعني الناس تستحمل شنو ولاشنو
الحرب والمسيرات والكهرباء.. دي ماظروف الناس تستحمل فيها
– الميزة الوحيدة لجواز السفر السوداني بوديك السعودية زيارة أو تحج وتعمر وتجي راجع بس
– نحن والحميير ( *”الدَعَّـامة”* ) في المنعطف الأخير
– إني شممت من العطور جميعها
وعرفت أطيبها علي الإطلاق
كل العطور سينتهي مفعولها
ويدوم عطر مكارم الأخلاق
**