خطرفات
*سامي دفع الله
– بسم الله وكفي والصلاة والسلام على النبي المصطفي (صل الله عليه وسلم)
– الواحد لمن كان صغير كانت *الهموم* مافي.. والمشاكل بسيطة شدييد.. أقصاها تتشاكل مع أولاد الحلة.. وأكبر *وجـع* طعنة الحقنة.. وأكبر *هـم* التسميع في المدرسة.. وأسوأ *انتظار* لمن تكون منتظر تحضر مسلسل أطفال..وانو *الثـروة* لمن تلم قروش عشان تشتري حلاوة أو شوكلاته أو تطلع مع الشفع تعمل بوش وفتة.. وأكبر *فـقد* لمن تفقد سنونك بتاعت اللبن..
* الواحد كان خاتي لمن يكبر *السعادة* حتزيد أكتر وأكتر..
* كنا ننتظر الخميس ونفرح عشان الجمعة إجازة.. ولمن تجي الجمعة نقلق عشان بكرة السبت التفتيش والتسميع والجلد..
* *الواحد اكتشف إنو كلما إنت كبرت..*
*سعادتك ح تقل*.. تناسب عكسي..
* لأنو الواحد بكبر بي عقلو الصغير داك فلازم تجرب وتضوق من الأزمات والمشاكل والمصاعب حتي تقدر تفهم أنو الحياة معقدة وصعبة شديد.. لأنو ح تحتاج وقت وصبر واجتهاد عشان أنو تصنع *سعـادة*..
* دا بالإضافة لي أنو ماكان في اسوأ مخيلاتنا أنو نعيش في زمن بائس.. كلو حروب ومأسي وأحزان زي مابنعيش حسي ..
*اتركوا لنا ماتبقي من هذا العمر التعيس لنا*
* عشان تعيش في الحياة البائسة دي محتاج أكبر نعمة أنعمها الله علينا وهي *العقل* ومعاها *النسيان*..
* وديل كلما تكبر ح يندمجوا سوا
وح تنسى العقل عشان تعيش
وح تكون في جهاد مع الحياة ومع نفسك وح تنسي احساس السعادة وأنت صغير وح تبدا تعيش في جو من اللامبالاة كلما تكبر..
*ومازال البحث عن السعادة مستمرا*
*كسرة*
* مفروض لمن تجي تكتب ال(سي في) بتاعك تكتب في خانة الخبرات: الصبر والثبات والقوة و التشبث بالحياة والقليل القليل من مهارات البحث عن السعادة
– أبوهم الله يرحمو سمّى الأول محمد وياهو طلع زي ما شايفين كدا.. فشكلو قال تاني ما ح أخسر فيهم إسم..انت ياود ح يكون إسمك (شخبوط).. وانت (طحنون) وإنت ماعارف إيه..
ياهو طلعت الأسامي كدا…
– الا تشم ريحه الحريق حتي تعرف أنو الحريق قرّب ليك؟…شوفة النار من بعيد ما كفاية؟..
– داعميين المليشيا في السوشيل ميديا جوازتهم دايرة تنتهي وبقوا يتباكوا..انتظروا.. الراحل المقيم قال المستشفيات جاية احتمال بعدها الجوازات طوالي..
– (الماعون الليّن غسيلوا هيّن)..
نصيحة من شخص متزوج
– الحمدلله الكهرباء استقرت خلاص.. بقت مابتجي نهائي
– الشوق ماكعب كعب الشوق للزول الكعب..
– هل الحزب الجمهوري في أمريكا شعاره: الحرية لنا و لسوانا”
زي العندنا هنا؟
– رحلت ومازالت هنا..ربنا يرحمك ويغفر ليك يافائزة وكل موتى المسلمين
– لمن أدندن ماتركّز في الصوت والحبال الصوتية وتشبكني: (صوتك كعب وشين) ..ركّز في الإحساس ياعديم *الحسحسة*
– مَن رآه بديهةً هَابه ومن خالطه معرفةً أحبَّه له نورٌ يعلوه كأن الشمسَ تجري في وجهه
صلوا على النبي الكريم محمد رسول الله صل الله عليه وسلم
– من الحاجات (الغيازة) جدا..
تكون قاعد في صينية غداء بتاعت مناسبة وأول لقمة تشيلها من الضلعة تطلع ليك لحمة النوع الفي شكل *لبانه* داك..الناس شغالة تعضي وإنت تلووك وتلووك وتلووك لاقادر تمرقها ولاقادر تبلعها..
– في ناس بتتعالج بالكيماوي وفي ناس بتغسل في الكلاوي رغم الظروف نحن في نعمة كبيرة والحمدلله..
– يجي وين الصاروخ الإيراني جنب الصاروخ السوداني وخصوصا لمن يكون لابس *التووب*..
– الكلام الشين ح يتقال فيك حتى إذا كنت ملاك.. الكلام السمح
ممكن يجيك في يوم وفاتك
ودا زاتو إلا يكون عجبهم الغداء
– في ناس فقراء جدااا وماعندهم غير القرووش..لا دين لا أخلاق لا كرامة لا رحمة..
– أمريكا تسحب قواتها من الخليج بعد تهديدات من النقيب خلا شيراز..*( خادم الله سابقا)* بعدم العبث بالمنطقة
– سودانير ربنا يطراها بالخير
طبعا الوجبة البتجي حقت أطفال مابتشبع زول كبير..المهم واحد بعد أكل قال للمضيفة ممكن وجبة تانية؟
المضيفة قالت ليهو: إنت قايلنا ضابحين؟ ثم تانيا ماتفتح لي باب زي دا..
– خطاب الهالك يحتاج لتحليل معمق وشامل وأسئلة كثيرة تحتاج للإجابة..هو قال *فقدنا أعز مانملك* يكون قاصد جبل موية؟
– المواطن السوداني..كهرباء مافي موية مسارقة.. شبكة طاشة.. بعوض ناشط ..وجيب فاضي.. وتدوين عشوائي.. وشباب بائس
وبعد دا كله تظهر كل يوم حركة مسلحو تهدد بالتمرد واصفة إياه بالجلابي صاحب الإمتيازات..
* لمن تولد في السودان الحياة بتكون سجلت فيك أقوان
بتبدأ الحياة وإنت مغلوب ٠/٤
– دايما تعليقات السودانيين في السوشيل ميديا ما ليها أي علاقة بالموضوع.. تلقى واحد بقول في نكات.. والتاني ناشر طريقة عمل الكمونية بالدكوة.. وواحد متابع كديسة في المطبخ.. وواحد بفتش على فردة شرابو.. وناس بتشاكلو على صحن عدس..
– نحن ليه ما عندنا صفارة انذار
زي إيران والخليج.. أول مايكون في قصف الصفارة تدوّر.. *لا لا ما قاصد صفارة الكورة*
– لما تحتاجوا لينا اتذكروا إننا كعبيين زي ماكلمتوا الناس عننا
– هل مدير مستشفى التجاني الماحي ح يناشد المجانيين بالعودة إلى المستشفى بعد إكتمال صيانة المستشفى؟
– طول ما إنت في السودان أعرف أنو بكرة في *بل* وبقت مافارقة
– كان جزء من أهل السودان قديما
يعيشون على تجارة الانضمام للحركات المسلحة والأحزاب الدينية واليسارية لكسب لقمة العيش..
*من كتاب تاريخ السودان عام 2100*
– الشفشافي الكبير ظهر
فعلا لايمكن أن يكون ميتا.. لقد وعدنا بجلب الديموقراطية
– الحرب دي رمت عمم ورفعت رمم
– إن شاء الله ح تمر *الحرب* وحنرجع تاني ..دي زي أزمة كورونا عدت ورجعنا نعطس ونكحكح في بعض زي زماااان
– وجود الدخان في الضحية لا يعني حتمية *الشية*
– إن الله جلَّ شأنه إذا أراد بعبدٍ خيرًا ألهمه دعاءه..
– الرووب : ملاح يؤكل
الرووب : لبس التخرج
الرووب : عدم القدرة على التحمل
يعني *واااي*
– – قووودااام قوودااام انييين بص يانصووور ياشيهاداة..*نحن والحميير في المنعطف الأخير*
– وَاللَهُ قَد جَعَلَ الأَيّامَ دائِرَةً
فَلا تَرى راحَةً تَبقى وَلا تَعَبا
وَرَأسُ مالِكَ وَهِيَ *الروحُ* قَد سَلَمَت
لا تَأسَفَنَّ لِشَيءٍ بَعدَها ذَهَبا
**