ما برانا
مقتطفات الجمعة
*** لإصلاح مساره كانت الأمهات ( في الزمن الجميل ) يضعن الشطة في لسان ( الشافع الكضاب ) وحالياً ومع ارتفاع ( نسبة الكضب ) على كل المستويات تأكد أن السودان الحبيب عانى في سنوات مضت من ( أزمة رهيبة ) في الشطة
*** عائدون إلى السودان سيعودون بلا أعزاء نزحوا معهم وتوفوا لرحمة مولاهم .. وآخرون سيعودوا ومعهم مواليد جدد .. وما الحياة الدنيا إلا مطار ( صالة وصول ) و (صالة مغادرة )
و ( لقاء وفراق )
*** لسنا وحدنا الذين يسعدهم الحديث ( عن الماضي ) فالأوروبيون ( صحى ) فيهم مؤخراً الماضي ويبحثون عن العيش فيه بكل تفاصيله وشعار ( غير مرئي ) يقول : ( من نسى قديمو تاه )
*** قلت لمرافقي وأنا أنظر إلى الأرض زمان كنا بنلقى قروش واقعة وقبل أن أتم قال اسكت ساكت تقع من وين هسي في قروش زاتو عشان تقع !!!
*** غنى الكابلي لحسن عطية وآخرين .. غنى أحمد المصطفى لعثمان حسين .. وعثمان غنى للشفيع .. شرحبيل أحمد غنى لأحمد المصطفى .. العطبراوي غنى لابوداؤود .. وابوداؤود غنى لكرومة .. وردي غنى لإبراهيم عوض .. ومصطفى سيد أحمد غنى لوردي .. وزيدان غنى للذري .. محمود عبد العزيز غنى لسيد خليفة .. غنى حمد الريح لعبد الدافع عثمان الذي غنى لعبد الحميد يوسف .. غنى محمد كرم الله للنعام .. ومحمد جبارة غنى لمحمد كرم الله .. منى الخير غنت للفلاتية .. والفلاتية غنت لفاطمة الحاج ومهلة العبادية .. والعميري غنى لعدد من الفنانين والقائمة طويلة وياحليل زمن ( الفنان الجميل ) والطرب الأصيل
*** مستحضرات التجميل سوقها العالمي من الأسواق ذات المبيعات ( الأكبر والأضخم ) وفي العام 2015 تجاوز استيراد السودان منها ال 300 مليون دولار القرار بحظر استيرادها ظهر على وسائل التواصل بشئ من ( الجد والهزار ) علماً أن المرأة وكما ( تتجمل ) لنفسها تتجمل للرجل
( ولا أنا كضاب؟ )
*** ( غلطات كتيرة الموبايل بيعملا ) واعتذر عن الإرسال الخطأ اعتذر عن الحذف ومع إعلان رفع الحظر عن استيراد الفول أعلن العودة ( للفيس ) للمزيد من التواصل ( وحبابكم ألف )
*** ياولد أدخل جوة .. يا ولد أطلع برة .. ويا بت امشي .. ويا بت تعالي واليوم كلو يا شدرابي ود خيتي ست الجيل الأمهات يكوركن من ما الاجازة بدت وضروري الناس تشوف صرفة للهم ده
بالتأكيد يا بت أحمد الاجازة المدرسية طويلة والهم كبير والاستفادة من الاجازة مهمة ..
بت أحمد ربنا يحفظك ويملأ جوفك صحة وعافية
*** نعم بالبيوب المريخية الكبيرة أبناء هلالاب ( على السكين ) وبالبيوت الهلالية ( مريخاب ) .. ونوافق ( ونبصم بالعشرة ) على ( التأكيد ) المريخي ( والمؤكد ) أن عدد الهلالاب بالمنازل المريخية أضعاف أضعاف عدد المريخاب بمنازل الأهلة .. مع الشكر النبيل للسادة المريخاب على هذه ( المصداقية ) العالية ( والشفافية ) الشفيفة
*** قال وأنا قاعد في الشارع قدام بيتنا جاني شحاد قلت ليه والله العظيم ما عندي حاجة .. قال لي بدون ما تحلف أنا من خلقتك ووشك المعفص كنت عارف كده …
تكرماً الابتسامة مع أمنياتنا ( بالابتسامة المستدامة )
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً ..
جمعة مباركة وكل جمعة وانتو طيبين
عبدالمنعم شجرابي ..