في حوار غير مألوف مع شيخ الامين ..قيام كأس العالم في قطر نصرة للإسلام( 2)

• أنا لما أشتريت بيت في لندن الدعم السريع ما (كان اتكون)
• لدي مدارس إنجليزية وداخليات وعملت شركة في دبي
• في ناس عينهم زي الذبابة ما (بترك) إلا في الأوساخ وناس زي النحل

*إحتفالكم بالمولد مختلف تماما؟

-نعم نحن نحتفل بطريقة مختلفة، (الشفع الصغار بكونوا منتظرين المولد عشان حلاوة المولد، والطفل لو سالتيو كرستيانو بلعب وين بوريك و برشلونة وريال مدريد بعرفوهم ، وبشترو اللعبية بيكم، وكدا.. ولو قلتي لي الطفل الرسول صلى الله عليه وسلم أمه اسمها منو ما بعرف، لأنو نحنا ماخدين الدين بالطريقة القديمة)، ونحنا الأن في عالم الذكاء الإصطناعي مافي زول بشيل تلفون نوكيا القديم، وهسي الليلة لو دايرين الدين القديم إلا يشوفوا الناس الكبار، والشباب سرقتو مننا الميديا و المخدرات واللهو, وتلقى ولدك قاعد في البيت بلعب لعبة مع زول في أمريكا, دا تجي تقعدي في الواطة وتقولي ليه الدين قتل.. الرسول صلى الله عليه وسلم بقول بشروا ولا تنفروا، يسروا ولا تعسروا ، وقبل كدا جات قبيلة للرسول قالوا له نحنا دايرين ندخل الإسلام وما دايرين نحج قال ليهم تمام، وما دايرين نصوم وما دايرين نصلي ، قال ليهم لا، قالوا ليه ما حنصلي الخمس صلوات كلها وكان قاعد بالقرب من الرسول سيدنا عمر وماعجبوا , قال ليه يارسول الله كيف كدا, وأعلنوا إسلامهم ومشوا وكان في قبيلة ماشه الحج، وشافوهم الجماعة الأسلمو ديل قالوا ديل مسلمين ماشين الحج نحنا أيضا نمشي الحج, قبيلة منافسانا تصلى خمس أوقات ونحن كمان نصلي خمس أوقات وبي نوافل، القبيلة دي تدفع زكاة ونحنا ما ندفع قالوا لا ندفع هم أحسن مننا في شنو ولما عادوا إلى رسول الله، وجدهم فعلوا كل هذه الأشياء لذلك الترقيب مهم ، والجيل الحالي لو جيت قلت ليهم حلال وحرام بمشي يخليك ، زمان كان الأب والعم والخال كلمتهم نافذة هسي النفوذ في الميديا يا أما نحنا نتواضع ونزل عشان ننهض بهم أو نكون متعاليين وهم يضيعوا مننا، وتاني جيل جيلين يضيعوا مننا.

*على ذكر سيرة كرستيانو ومحاولتك لتوظيف الحداثة والميديا في أمور الدين سقت مجموعة كبيرة من شباب السودان إلى كاس العالم بطائرة خاصة وتكفلت بكل إقامتهم.. القصة دي وراها منو وتفاصيلها شنو ؟
-أول حاجة أول كأس عالم يكون في دولة عربية ودا نصر للإسلام، وأول كأس عالم يبدأ بالقرأن الكريم وأول كأس عالم يشرحوا فيه الأيات وأول كاس عالم يستدعوا فيه العلماء من جميع الدول، وللأسف كل الدول كان مشاركة، ومبسوطة بالمشاركة إلا نحنا نتريق في شيخ الأمين الساق الناس.. هل كأس العالم فيه حرمة، كأس العالم أسلم فيه ناس كتار جداً، وخلى الغرب يعرف أنه في صوت بطلع إسمو الأذان وتتوقف الكورة ، والغرب كان ببحث عن ما يفعله المسلمين، كأس العالم حضره شباب مسلمين كتار جداً ولما شافوا نحنا وصلنا ومشاركين تغيرت الصورة الذهنية عن الطرق الصوفية (البقعدو في الواطة)، وفي ناس إنضموا لشيخ الأمين وأديتهم حقن ( سيسي سيسي) الما بصلي بقا يصلي بعد شوية بقيت أعمل ليهم دروس دينية صغيرة عن شجاعة الرسول وكرمه وأحببهم فيه وهم يقوموا يفتشوا عنه وكيف نصر الدين ، وحببتهم في الرسول والقصة نجحت نجاح كبير، وفي ناس عينهم قدر الذبابة،والذبابة والنحلة بتشابهوا والنحلة (بترك) في الزهرة وبتنتج عسل فيه شفاء للناس, أما الذبابة (بترك) في الاوساخ وتنتج مرض في الناس، ودايرين يشوهوا سمعة الناس, وديل مريضين, نحنا لمينا الشباب ومثلنا السودان، والتقيت شيخ من المغرب والناس كانوا مبسوطين ، وفي ناس عين الذبابة ما عندهم كتيرة لكن الحمد لله أتت أكلها والأمور مشت والشي (الدايرنو بقا).
*إستعدادك أنك تنفق أموال طائلة .. ماهي مصادر تمويل شيخ الأمين للمسجد والتكية وغيرها.. من أين لك هذا ؟
-شيخ الأمين بدأ التجارة في أوائل الثمنينيات في السوق العربي وأنا اول من أحضر شركة فرنسية لتنقيب الذهب في السودان ، عام 2013م وقاموا قالوا دا شيخ شنو ساكي الدنيا وساكي شنو، شيخ الأمين عنده مدارس انجليزية وعندي داخليات, وأنا اول من إشتغل في دبي (انترنت ستي) وكان معاي شركاء ودخلت في مجال المباني ، لكن التجارة كنت مغطيها بالمشيخة ما كنت داير أظهر وأشتهر بالتجارة ، داير ألم الشباب بقدر الإمكان، وحكاية الشيخ (يغمتو) لي دي ما دايرة داير الشيخ هو (اليغمت) للناس، والحمد لله ربنا فتح لينا أبواب كتيرة ، والجماعة كانوا بقولوا لي بصرفوا عليك ناس الدعم السريع, أقول ليهم والله أنا لما اشتريت بيت في لندن الدعم السريع ما كان (اتكون) ، والحمد لله بصرف على نفسي وربنا ببارك لي.