(أصداء سودانية) في حوار غير مألوف ومثير للجدل مع شيخ الأمين.. (3)

• عندي منجم دهب ممول من فرنسيين وأنا بجي أشيل القروش وماعارف (ببيعوالدهب وين)
• أنا ما وديت حميدتي للإمارات وعبدالرحيم كان بجيني في المسيد
• إستخبارات الجيش كانوا (قاعدين معاي) في المسيد
• هذا ما طلبته من قائد إرتكاز الدعم السريع في المنطقة
• البشير إستدعاني وطلب إعادة علاقتنا مع الإمارات ولعبت دور في ذلك

حاورته ــ داليا إلياس
نلتقيكم اليوم من منصة (أصداء سودانية) في حوار خاص واستثنائي.. ضيفنا العزيز صاحب كاريزما وحضور, له تأثير, فاعل خير, نجم مجتمع, مريدين ومحبين هنا وهناك وكارهين أيضاً.. نحسب أنه في كثير من الأحيان مستهدف, مثير للجدل, لفت الانتباه بخروجه الدائم عن المألوف.. نجلس إليه اليوم لنفتح كثيراً من المغاليق الأبواب, نطرق عليها ونحمل تساؤلات المجتمع.. هذا الرجل عظيم التأثير لا يمكن بأي حال من الأحوال سواء اتفقت معه أو اختلفت أن تتجاوز تأثيره الاجتماعي والإنساني والوطني.. سعيدة جداً ويضاف إلى سجلي الإعلامي المتواضع هذا الحوار مع شيخنا الجليل الشيخ الأمين
*انت من أوائل الناس الذين إشتغلوا في مجال الذهب ..هل لديك منجم ذهب ؟
-نعم عندي امنجم داخلين معاي فرنسيين وهم الممولين، وباعوا الشركة لشركة خليجية والحمدلله لقيت منها رزق وأنا في ناس شغالين معاي وأنا متفرق للمسيد.
*هل انت بتبيع الذهب للإمارات؟
-انا ماعندي علاقة بإدارة العمل وبحضر في آخرالعام وأراجع حساباتي معاهم وبعمل اجتماع لتوزيع الأرباح (وبشيل قروشي وبمشي) ، وأنا (ماعندي شغلة يبيعوا وين أو في أي دولة) وما بتدخل في شغل الإدارة
*أنت عندك علاقة مع الإمارات ؟
– نعم عندي شغل معاهم.
*ماذا عن الوساطة التي لعبت فيها دور بين البشير والإمارات؟
– نعم صحيح .. البشير استدعاني وقالي دايرنك تخدم الوطن، والبشير طلب عودة العلاقة مع الإمارات وذهبت إلى الإمارات قابلت شيخ في الامارات ، وأنا دخلت خدمة للشعب، وفق عمل الدبلوماسية الشعبية ، والحمدلله العلاقة عادت
*رغم ذلك الآن شيخ الأمين ممنوع من دخول الإمارات.. أو هكذا يقال ؟
– يقال نعم.. حصلت مشكلة وقالوا شيخ الأمين لديه علاقة مع المخابرات القطرية, وكانت العلاقة بين الإمارات وقطر متوترة وتم اعتقالي وحققوا معي حول علاقتي مع القطريين ولما لم يجدوا حاجة اطلقوا سراحي ، وفي ناس كانوا بقولوا سيتم سجني مؤبد ولو كنت مدان ما كان خرجت وعدت للبلد, وفي السودان أيضا اعتقلوني وما كان في سبب للاعتقال، وبعدها تم ايقاف المسيد ومنعوا الذكر والتجمعات ، واضطريت للسفر وتركت البلد إلى أن نهى الله الظلم ورجعنا معززين مكرمين ودولة الظلم ساعة ودولة العدل إلى أن تقوم الساعة.
*يقال إنك كنت السبب في توطيد العلاقة بين حميدتي والإمارات؟
-لما ذهب حميدتي إلى الإمارات كان شيخ الأمين خلاص (شغلتو اتكنسلت) مع الإمارات، وبقيت خارج السودان وكنت في لندن وبعدها قامت حرب اليمن واستعانوا بي جنود من الدعم السريع وهو ما عمل على توطيد العلاقات بين الإمارات وحميدتي.
*ماهي طبيعة علاقتك مع حميدتي ؟

– حميدتي كان الرجل الثاني في الدولة وكل الناس كانوا يتمنون أن يلتقوه, وأنا عندي مسيد وكان حميدتي بيحضر للمسيد هو واخوه عبدالرحيم وبحضر الذكر (وباخد قعدتو وبمشي) وهو رجل صوفي وكان بطوف على المساجد.
*في ناس بقولوا شيخ الأمين ظهر فجاة ..حدثنا عن خلفيتك الصوفية بديت وين ومع منومن المشايخ ؟

– في السجادة المكاشفية وشيخها عبدالباقي المكاشفي وهو رجل صالح ومعروف وشيخ عمه عبد الله ود العجوز, وانا قابلتوا في الثمانينات كنت ممتحن للثانوي وجذبتني طريقته وبدأنا مع بعض واستمرت العلاقة وكنت في طريقي للدراسة الجامعية في روسيا ومنعني (ووداني جامعة الملك عبد العزيز في جدة ، وكان قالي أنا دايرك تكون في الخرطوم ، وقالي عايزك تكون من الشباب عشان تفهم لغتهم انت ويمكن ان تتحدث معهم) وكنا شيخين أو ثلاث وبدأوا يوصونا وعلمونا ان الجلابية التي تلبسها الصباح ما تلبسها المساء لأن ناس الخرطوم ما زي ناس الأقاليم وناس الخرطوم فعلا لو جاء واحد بيت بكاء وجا واحد حافظ القرآن برواياته السبعة ومدير جامعة ونزل من ركشة وقال الفاتحة بقوم عليه أبو المرحوم أو ولد المرحوم، وممكن يتكلم بي موبايل ، ويشيل الفاتحة بي يد واحدة, لكن إذا حضر شخص آخر راكب عربية آخر موديل و(لابس صح) ونزل من باب العربية وقفل الباب الخيمة كلها تقوم عشان تشيل معاه الفاتحة ومابخلوا يقعد في الصيوان ، بدخلوه المضيفه وينادوهو بالالقاب يا (لورد ويا مولانا), والشيخ قالي الدين محترم والتصوف محترم ما دايرين زول يعاين ليه بدونية عشان كدا البسوا كويس واشتغلوا كويس واركبوا عربات سمحة، وفعلا دي جذبت ناس كتير ، زمان أهلنا في الاقاليم بقبلوا الشيخ حتى لو فقير هو شيخ لكن عندنا نحنا غير كدا وكلامنا و(استايلنا) ما كدا عشان كدا نحن وريناهم.

*وريتوهم الطفا النور منو؟
– ضحك
*جيت وصلت وفتحت المسجد وبقا قبلة, في وقت كان الحاجة غريبة وكان في رفض من الجيران ؟
– نعم صح.. والآن هم بقوا حيران ويخدموا معاي في المسيد والحرب ورت أصل الناس شنو.

*التكية كانت بادية بشكل مصغر قبل الحرب ،حدثنا عن دور التكية والمسيد في الحرب وانت قعدت خلال الحرب؟
– أنا كنت بتكلم مع الشباب وهم متعلمين وشغالين، ونحنا بنعمل الأكل برانا ونقدموا, الكلام دا كل في بداية رمضان قبل الحرب ، والحرب لما بدأت كانت مخازنا مليانة والدكاكين بدأت تقفل والمستشفيات تقفل والناس تمشي الثورات تجيب الأكل ، وانا قلت للشباب يا أما نمرق أو نقعد نخدم أهلنا, في ناس كبار رفضوا يخرجوا من بيوتهم لذلك في شباب قالوا لي نحن قاعدين معاك، ودي كانت رسالة للناس (البقولو جكسي) ، وعملنا التكية وزدنا التكية والناس بقت تجي المسيد بعد تقدم الجيش وطريق الثورة قفل وكان عندنا صيدلية وأطباء، وقلت لو فتحت باب تبرعات يقولوا الناس داير استرزق من الحرب وشهدت الشباب ، وقلت ليهم أي مال رزقني الله به أنا عايزانفقو، وأنا لي 815 يوم الوجبات والعلاج كلو شغال وموثق وعندي 6 تكايا في الجريف و3 في الفاشر وبرسل ليهم بنكك وبشتروا الدقيق بأسعار غالية وعندي تكية في شرق النيل والثورة عملت 13 تكية وللآن شغالين ، دا رد جميل للبلد العرفنا عظمتها بعد مرقنا منها وبلدنا عظيمة، لما يقولوا لينا يا نازحين ويا لاجئين ، والناس كانوا بتشاكلوا في الضيوف في الأقاليم، وللأسف تجار الازمات قاموا بعد الحرب ورفعوا سعر الايجارات
لاخير فينا إن لم نقلها.. التكية لعبت دور أساسي في دعم الأسر
*وبرضو نحن نسالك حديث الشارع التكية كان بجوك ناس الدعم السريع وتصورت معاهم .. هل كانوا داعمنك؟

-أنا أثق في جهاز المخابرات السودانية من جندي حتى فريق, دخلوا كم كورس وكم دورة .. يجي واحد ماعارف حاجة يقول شيخ الأمين دعامي.. الطيران كان حايم فوق راسنا، وأنا كان عندي حراسة من الاستخبارات العسكرية لحد ماطلعت من السودان عارفة الكلام دا.
*ماكانو لابسين رسمي؟

-لابسين وبسلاحهم وقاعدين
هل في وجودهم بجوك ناس الدعم السريع .. لالا الناس كانوا بقولوا انا دعامي ، وفي ضباط شوية متحمسين بقولوا حنصلك ونبلك والميديا شغالة وفي فترة خلوا حميدتي وبقوا شغالين شيخ الاأمين.
*دا بعد ظهورك في فيديو مع الدعامة؟
– هل يعقل أنا قاعد في محل سيطرتهم كيف لا أتعامل معهم ، ونحنا كنا محتلين من الدعم السريع 9 شهور نحنا ماشفنا مواطن غير الدعامة لابسين كدمول وشايل سلاحه وانا معاي 1500 أسرة وكل مرة نتكلم مع الدعامة نحنا دايرين نطلع يقولوا لينا ماف مرقة ودايرين نقابل القائد بتاعهم في الارتكاز بعد جرجرة.. وقلت له داير اتفاهم معاك ، وجبتو المسيد جاء وشاف المواطنين، وقلت له عندكم قضية مع المواطنين ولا الجيش .. قال لي مع الجيش، قلت له هنا في جيش قال لي لا، قلت له لو عايزننا نمرق الآن بنطلع قال لي لا ما تمرق ، قلت له جيب لي ارتكاز هنا، وخلي زول واحد منكم يمشي معانا سوق ليبيا لانه في مية إرتكاز في الشارع وممكن يدقوا الناس ويشيلوا العربية، وكل الفيديوهات عندي ، أنا كنت بقول انو انا محتاج لي المواطن لا جيش لا دعم سريع ما محتاجين لي ولللآن بقول الكلام دا ، وعندي بيت في لندن وحديقة كبيرة ممكن أفتح لايف واقول أنا داعم الجيش .. لكن لا أنا قعدت الرصاص والدانات تقع في رأسي وأعالج في الجرحى وأدفن في الموتى عندي بتي طبيبة ما طلعت قاعدين نعالج في الناس في ناس جابوهم بي درداقات وجابوا لي واحد جريح ملازم وصحيت البت من النوم وجات تعالج الرجل ، في اللحظة ديك دقت دانة في غرفتها لو كانت قاعدة كان ماتت..انا لا داير منصب ولا حاجة دا عمل وطني بدل اقعد افتح لي لايف من بعيد ، أنا بشرب في الناس موية من البحر أودي بيت المال ابوروف حي مكي العرضة نوزعها بي تكتك ، وفي ناس بشربوا موية كوز في اليوم وبنوم ساعة أوساعتين وعندي 4 من شبابي استشهدوا*أنت تعاملت بدلوماسية.. وفي أصوات أشارت إلى أن ماحدث كان بالتواصل مع استخبارات الجيش؟
-والله استخبارات الجيش ما قصرت وعرفوا أن دوري إنساني ولو طلعت الناس دي حتتعب ، في ناس في ود نوباوي كانوا ما بقدروا يصلوا المسيد ولما وصلناهم بعد اشتباكات لقيناهم جنايز متحللة .. وكان ممكن اتكلم معاهم وأرفض وجودهم ممكن يدوني طلقة ما تسوى كم جنيه ويقتلوني عشان كدا أنا تعاملت معهم بحكمة لحقن دماء أهلنا والآن بقول للناس البتتكلم عن شيخ الأمين وتتهم وتقول أنا دعامي بقول ليهم بعد البلد دي تنظف وتكونوا مامحتاجين لي شيخ الأمين شكلوا لي محكمة في سوق أمدرمان، لو لقيتوا علي حاجة واحدة ضد الوطن قوموا ب(شنقي) في سوق امدرمان وربنا عالم أنا كنت شغال شنو.
*كنت تقبل إعانات من الدعم السريع؟
-أحسن اقول ليهم مادايرها شيلوها أرجعو بيها عشان أنا زاتي أرجع معاها ، وانا الوقت داك لو أدوني لحم خنزير بشدوا للناس الله ما بحاسبني لأن الناس كانت بتموت بالجوع ولو شفتي الطريقة البنمشي نجيب بيها الأكل الزول بتشهد وبطلع
دا نوع من الجهاد .. ومن رأى ليس كمن سمع.. انا ماعايش تفاصيل الحرب ما من حقي افتي او اطلق اتهامات ودي درجة بعيدة من الوعي.. وانت تعرضت خلال مسيرتك لحملات تنمر كثيرة .. كيف تتعامل معها؟

افضل انسان في الوجود سيدنا محمد ص، وجانا باسمح رسالة في الكون وكانو بقولوا ساحر ومجنون وغيرو وتحدثوا في شرفه، دا الرسول كانوا بقولوا فيه كدا ، ودي حاجة عادية ونحنا عارفين كل ذي نعمة محسود، وشيخنا كان بقول لينا لو جبت عربية آخر موديل ما كبيت ليها بنزين ما بتمشي والبنزين لسان الناس ، الناس بحسدوك، وشيخنا كان بقول ليك كل ما تعلى حسادك بكتروا وكل ما ترتقي حسادك بكتروا ، وانت لازم تكون كالنخلة تعطي الثمار لمن يجدعها ، في واحد كان بشتم فيني 5 سنوات اتفاجا انه ابوه قاعد معانا في المسيد 3 شهور ونحنا عالجناه.