الوالي البخيل
مقتطفات الجمعة
*** شهران تقريباً يمكن أن نسميها ( فترة الصمت ) وخلالها لاتصريح لمسؤول حكومي ولا حزبي ( ولا خبير استراتيجي ) والكل صامت وطالما لم يكن الحديت من ( فضة ) فالسكوت من ( ماس ) والأمل كبير في ( استمرار الحالة )
*** غير مهم أن يكون ( الشحن ) حكومي أو خاص والمهم أن ( شحنات كبيرة ) من العصي .. والمشايات .. والكراسي المتحركة .. والمستلزمات الطبية متجهة من القاهرة للسودان
( وأهو ده الشغل )
*** هبط ( فخر السودان ) بطل الدوري الرواندي أرض الوطن بسلام ( فتزين ) الوطن بهلالين هلال في الأرض وهلال في السماء وشعبه ( خرمان ) والأزرق لمزيد من البطولات عطشان ( ومين زينا )
*** ابتلى الله العباد والبلاد بولاة ولايات يتميزون ( بالبخل ) يتصفون به ويتسابقون عليه ( والشاهد ) ألا واحد منهم يريد إطلاق اسم شهيد على شارع من مدن ولايته ولشوارع بلا أسماء ومثل هذا ( الوالي البخيل ) يستحق الإعفاء ( والبلد ما ناقصة )
*** مدينة بتسبرج .. مدينة الحديد تقول أنها من بنت أمريكا ومن حق أم المدائن عطبرة أن تقول أنها بنت السودان وحق علينا أن نقول أن اتحاد عطبرة هو ( سيد الاتحادات ) وهو يرسم ويخطط وينفذ موسم كروي لكل الدرجات بتقدير ممتاز
( عطبرايون أحبكم )
*** أولاد الحلة شغالين نفير في البيوت ببنوا ويجيروا وينضفوا وينجدوا ويصلحوا السراير والكراسي والله يا شدرابي ود خيتي ست الجيل رجعوا البيوت زي ما كانت ..
ده شغل ممتاز يا بت أحمد ياريت نشوفوا في كل حتة بت أحمد ربنا يحفظك ويملأ جوفك صحة وعافية
*** في منتصف الثمانينات تلقى الهلالي د. عثمان صديق عرضاً ممتاز من شركة سعودية فقال له صديقه الهلالي الفخيم حسن علي ( جمارك ) علي الطلاق ما بتسافر مصطفى النقر رجع والكابلي رجع البوديك السعودية شنو !! الواقعة تذكرتها وصديقي حاج زروق يفاجئني بمحادثة ( أنصاص الليالي ) وبدون سلام يقول يا زول الهلال في الخرطوم المقعدك في القاهرة شنو ؟!!!
( وهلالاب والأجر على الله )
*** وبعدين !! بعدين مع الزول ( الرابط مكنة الرئيس ) شنو ( البيحلنا منو ؟؟)
*** الأخ والصديق العزيز الفريق شرطة عابدين الطاهر دعني ( أعزيك ) وأبارك لهيئة النزاهة والشفافية تعيينك رئيساً لها ( وللطرفين ) الأمنيات بالنجاح والتوفيق
*** ملاسنات القونات ( والشكل والكواريك ) الحاصل هل يا ترى لاكتساب الشهرة أو المزيد منها ؟ أم ميلاد ( للصحافة الصفراء )
و ( حوالينا وما علينا )
*** الهلال بطلاً للدوري السوداني .. الهلال بطلاً للدوري الموريتاني .. الهلال بطلاً للدوري الرواندي .. والهلالاب ( فرحانين ) المريخاب ( زعلانين ليه ؟؟)
*** ادفس وارفس .. وأغمض وأفتح .. وأفتح وأغمض .. وأقوم وأقعد .. وأقعد وأقوم .. وأتمطى وانكمش .. وأكتب وأمسح .. وتغلبني الكتابة وانتصر ( وأغلب الكتابة )
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً ..
جمعة مباركة وكل جمعة وانتو طيبين
عبدالمنعم شجرابي ..