الجَـرِحْ المنوسِـر
*عود مرا
*سعادة عبدالرحمن
الجـــرِح المنـوسـِـر مـابتطــبو الكيَّـــة
ومـابــِّرِّد حشــا المحروقـة قولة احيَّة
الا القــول بطيِّــب خاتِــر المـأذيّــــــة
باعـك واشٔــتراك زولاً غفــرلك سيَّـــة
*****
التجــي مــن بعــيد قسـمتنـا نتلقـاهـا
حـارة الشـينة مـن اللِّيـكا كـان سـوَّاها
لابتقـدر تصــل حــداً تلــزِّمــوا ياهــــا
لابداوي الزمــن جرحــك ولابتنســاها
*****
المـا سـاتـرو الله كضــبتَ مابِتســترو
والزول إن خِتيت فيهو المروَّة اخترو
الضُفُـر ان نقَـح، صحَّ البدن في بتــرو
دربـك اعـوَجٔ ان قبـلك كُبـارك عِتــرو
*****
احذر وش منافـق بي بشاشـة يِقِـلدك
وحين تدِّيو قفاكا سياط لسانو تجلدك
ما تأمـن عَـدوك اذ حـكَّ ضفرك جِـلدك
نسَبـَك للـوراكٔ وصحيح ابـوك الوِلـدَك
*****
اتنيـن إن خِتَنَّـك في المِـحَــن ماتبالي
رفقـة دون واطماع النفِس في المـالِ
ترديكَ الهوان، وان كان مقامك عالــي
والاتنيـن خَصِــم مــن صالِحِ الأعمــالِ
*****
اتنيـن لا تصغـِّـر نفٔسَــك اتحاشــاهـــا
سيرة الناس، وان كام الخلوق لايكاها
الموقدلو نار، يــوم بكـرة بتوطـاهــــا
حــارة الشينـة من اللِّيكـا كان سوَّاهـا
*****
اتنيــن اعمَـلِن لاتـرجـىٰ فيهـن شكــرة
لقمة حوف جعان زي الخدار في الصحرة
ماتبخل قُدُرتـك في الرشاس والنَـتٔـرة
اصفح ما استطاع واعمِل حساب العترة
*****
اتنين في الكريم عن الرزيلة تصُرٔفـو
اصلوا وكت يجيلك وفي الشديدة تعرفو
بذلو مِتِـل سروفاً ،وديمة اخدر جـرفو
الند والجـلاد تعـرف خشومـك كرٔفُـــو
*****
الزول مِـن يِحـِس تامالُو حِتَّـة عافيــة
يتكالب علي الدنيا ام سُروفاً صافيــة
مسكين ينخدع لامـِن تجيو مِتلافيــة
تقلِب كل موازينو وحليل الوافيــــة
*****
الزول البِسُوم أعَوَج بيشُك في غيرو
ويَحَسب كل زول فوق الرزيلة نصيرو
ياخدك بي جرايرو حكمو فيكا مصيرو
أصلاَ مابِشـوف عـوجـة رقبتــو بعيـــرُ
*****
أوعـاك مايغُشّك في الحديث حكَّـامو
وماتقيس ابن ادم بي حُسُن هِندامـو
راجـلاً تزدريـو عند الله عالـي مقامـو
(مايُدريكَ) قـال رب العبـاد في كلامو
*****
عَمَــلَك ماتقـدِّم، ومـاتحـرث ايديكــــا
مسؤول منو قدَّام، واسيِّ بِشهـد ليكــا
اعضُـض بالنواجِــذ ســِرَّك البـأذيكـــــا
كـعَبَــة شمـاتـة اليـابـاك، وضـُرّٔ اللِّيـكـا
*****
النفِـس ان بقـت محـروسـة بالايمـــان
وجُبِلت قبيل تقـوى وزُهُــد واحســان
تَعَـــرِف انــو دايمــاّ ماتَـديـــن تُـــدان
وقالـوا العقـدة خدرة واليبيع ندمــان
*****
عرضـك ماتنوشـو وللخـلوق تشكيهـو
مـــا بالهينـة تاخُــد ذلَّتُـو وترميهـــــو
حقو عليك نصيحة وللصواب تهديهـو
ضُفْـرك كان نقـح، تسهـر علي تلوليهـو
*****
السَـهَـم البِشُق جوف الفراغ مابْضُـرك
الموت لي عدوك باللَّاي* عليكا بسُرك؟
إن تلجِــم هـــواك للـهِ حفظــك ودرَّك
قيـد نفْسَـك هـوان، للمهلكاتِ بِجُـــرّٔك
*****
الحسـس القديـم لابـُـد يتـاوِر سيــدو
ماتراود السفية ، بِسُكاتك انت تكيـدو
الزول ان طَـلَق مين عقلو ليهو بعيـدو
الله طلق نِعمٔتو ما ادي زول في ايدو
*****
اصلَهِـن المِحَـن يوم ان صِفَـن بتبــارن
وقعها زي سهام في ليل صفاك بتبارن
مرة فقِد عزيز وصروف زمان ان جارن
يتواتِن تقــول ليـل وقعــتِن بختــارن
*****
لومَـك لاتَسَــؤ فـي الماعليهـو ملامــة
دربَـك كان عديـل، مابتنحنيلك قامَــة
ماتَّابْـع الرزيـلة وتبقـى ليكـا ندامـــــة
الوجع ان قِصِـر وان طال بياخد ايامه
*****
الماعندو والي ، كان غِـلِتٔ* ماتحاسبو
وراجلا عينو من مال الرجال ماتناسبو
والزول البخِس اوعاك عداوة تناصبـو
والمـابشبهــك امثـال كتيـرة تناسبـــو
*****
اللــه يـابْن آدم يوم تضيـق الواسعــة
لابجديكا مــالك لاولادتــك نافعــــــة
اعمل بالتي هي يوم حسابك شافعــة
كتر من صلاتك تنجى يوم الواقعـــــة