تعال اهلك

سعادة عبدالرحمن 

تعال اهلك
وشن لاحق؟
ترا المكتوبة لابتختاكا
لابتنفات ولابتنسك….
تعال اهـَلك قَبُل بِـيض
السنيـن تَحَـلَك..
تعال شُـوف البَـلد عِمـْرَت
وانسدَّت وراكَ بيـوت …
وبقـت المِحـنة لا في الطـاقة
لا في الفـاقـة
لا في القُـوت…
نِحـنا وِكِـرنا في الحَـرِب
الأبت نيـرانـا
لاتَختـانا
لا ها تمـوت….
وياما اترمدت جِنيَات
وياما اترمَـلِن بنُّـوت..
ومن اهَـلَك….
تعال الغُـربة شِـن فيها
ام حصاداً بــوْ….
كُضُــب والفاتـو قُبَّــالك
عمــاراً سَـــوْ…
قابضــة علـي الوهن ايديْ
اخاف تعْصِــف عِشيشنـا
النَــوْ…
بُلُـوداتك بَعَـد بي خيرا…
صـُد والْفَــىٰ العَقَـاب
من ضــوْ…
بدرانيـكَ لو خـاب
كان يعشيـك مابْتبيت القَـوْ….
تعـال يـابُـويا
مُرْسـالك وصلنا البَـارِح
النـَعلات..
وحاجات ضُمّــة هِـن حلوات..
إلّلا صِغيْــرة هَـدَّامــي!!!
ماعارفنـي يومي بزيـد؟
سميسِمـة
لا مِـن أسِّـي بقيت
قدُر سـامي…!!
دَحِـين يابُـوي كِـبرتَ خـلاص
دخلتَ المدرسة اللَّتنا
وحِفظـتَ الحمـدُ والإخلاص…
وسورة( النـاس)…
وبعْـرِف أعِـد نِعَـاجْ عِتمــان
وغنَّــامِـي..
كِبِرتَ بقيت قَــدُر سـامــي…
نسيت يا بُويّْ!!
أنـا الأكبر
زمــان ماقُلتَ يوم أكبر
أنا الرُكازة والحِمِل العلَـيّ اكتر
تَخُـت كفَّـك علـي كفِّـي
واسِنْـدك يابـا في كتفِــي
واخاف تـعَـتر…
تعـال علِّمنِـي كيـف اكبـر
تعَـالْ علِّمنـي ما اصغـر
تعال قول ليّْ….
تعال علِّمني شِيْـل حملك
علي كتفـيّْ…
أنـوم واصحـىٰ
ألقـى دموعـي في عينيّ..
فِتـرت يُمَّــة مِـن شكْـوايْ
غلب حالي الطبيب والكَــيّ..
وفِـترت من سـؤال عينيّ
وعندي سُـؤال
وماعِرفَت تفسِـرو ليّ…
متين يابُويا ترجع لي،؟!..
وليه يا بُويا انتَ بعِيد؟..
قالت يُمَّــة شان ترسِـلْلَنا النعلات
هدوم العيد…
وشان ماتْطُـقنا الحاجة ونمِـد
اللِّيـد…!!
ليه يا بُويا إنت بعيـد
وديل اصحابـي
بُوهُـم فِـي ،
ولابسين برضو زيـيِّ جديـد..!!!!
بتذكّـر زمــان يابُويـا
ساعة جيتنا يوم العِيد..
سُقْـتَنِي حِـتَّه فيها الناس
تقول الفين
صلُّـوا وقـاموا فرحانين
وما ابت السلام ايدين!!
غـريبـة وكان أبـوهم فِـي!!..
دخلنا بيوت كتيرة شديد
نضيفـة ولابْسَـة برضو جديد
حلاوة وجيبي مُتْـكَفِي…
واقولك تَبْ فترتَ ابوي
تقوللِي اطلع علي كتفِـي..
وأطلع فوووق واشوف الدنيا
بي احساس يفوق وصْـفِـي…
تعال يابوي
منو اليَلعب معـايّ (حــرَّت)
نَـلِف الحوش..
تعال
والله ما اقـول ليكا تـاني :
ادينـي يابـا قـروش..
واعِـز حَلْـفِي
ابيعلك نَعَـجَـتي وغَنَمــاتي
بتكفـي..
شان ماتْـطُقَـنا الحاجة ونمٍد اللِّيد..
وشـان ماتبقـى مِنِّـي بعيد…
دَحِـين يابُويا كان باللِّيـد..
بَعَـد جيتك يكون العـيد…
تعــالْ يـا الدُخـري لي أُمَّـك
قفـاك أعَـوَج
وحـالِنـا بي وراك مابْسُـر …
تعـال لِلقِـمْـحـن آ العوبـا
وتـرا انقفَـلت بيوتِـن كُــرْ….
انا اتنَبَرْتَبَـك للحـارة..
والدَرت البِدِس الفــارَّة…
يـاتوب الليـالي امْ قُــرْ…
تعـال ألْـزم وكٍـت عوزتنـا
مابفُــوت الشديدة الحُـر…
تعَـال واركِز مع الراكـزين ..
وخلِّـي الباقيـة بيهــم
قسمة تصبِـح من نصيب اتنيـن…
يا الداخـراكا للحُــوبة…
بلـدك ليها حـق وديـن
تعـال اوفيهـا يـاادوبـا
ودة الوكِـت القبيل راجِـين
تَسِـد فجَّـتنـا يا العُـوبـَة ..
ودحْــراً للحــروب يا الزين
تعال وابنيهـا مـن طـوبة
وعلـي مهـلك…
تعـال واللِّـيد عليِ خيْتـا
بترمـي الشايلا لا قُــدام…
حُضُــن هــادي البلد يَوْسَـع
قَــدُرْ كـلَّ الخُـلوقـا تمـام..
تهـدهِـد حــرَّة الغـافِـل
ترتِـق فـي جُــروحا ســلام…
تعَـضِّـي علـي النواجِـذ حيييل
وتِـتهافـت علي اليَنْضَــام…
وِلادك ياعشـا البايتـات
ما ظِــن شافــوا حبوبــة
ولا غــرَّت عيونـي وكِـت
الوليهم واغنيـلُم قَمَـر بوبـا…
ويشـربو من قِليلتي الصافية
مويـةً ماهـا مربوبة
ويلعـبوا (سَـكْ) وبالحفَّـار…
( كديسـة وفــار)..
انـا البَحَـجِـز افِـر ايديّ…
أخـاف تخْــتِفْ صِـقيرة جِــنَيّ
يقـول دٍسِّينـي حبوبــة..
ومـا ظِـن لعبوا يوم (حـرَّت)
(سكَّـج بكَّـج) (العميانة)
واللَّا (شليل) ولا (شـدَّت)
حمار السوق
يخَـلُّـوا الواطــة مـقلوبـة…
وما ظِـن سمعوا بالواسوق
ولا فِصـيدنـا( بالحنقـوق)
ولا (المارو)
ولا (الويكاب)
حــلات كِسـرَتنـا يـاولدي
رِهيفــة وتسنٍد المريـوق….
تعــال خليني لوليهم
تعــال خليني حجِّـيهـم:
فاطنـة السمحة والغولـة
ويَنُــومـو بِشـيش
قبُــل تكمــل
وعـاد شِـن تاني فيها فَضَـل
بِقَـت ايـامـي محسـوبـة….
تعـال يا الدُخـري لي أُمـك
تعـال والباقيـة مكتوبـة…