الدوري الرواندي ما عاوز (السباحة) دي كلها

فاطي سطر
محمد عبد الماجد

أول ما يحقق المريخ انتصاراً في الدوري الرواندي بهدف وحيد بسمع ليك عن برنامج استشفاء، وعن راحة من التمارين، أو عن تمارين سباحة.. في شنو ما عارف؟
يا جماعة الدوري الرواندي ما عاوز (السباحة) دي كلها.
قبل المباراة بقرأ الزعيم يتحرك على ملعب المباراة.
الزعيم يجري عملية الإحماء.
بقول القبة تحتها فكي.
بعد المباراة الزعيم يخسر المباراة ـ سباحة في الفاضي.
عندنا قريبنا لزم.. كان كل مرة بقول لينا أنا عرسي في العيد ـ ونحن نقوم ونقع، ما خلينا ليه حاجة، شئ مرطبات وشئ حفلة شاي، وشاي يوم مفتوح.. الصيوان كنا بنحجزهُ، وفنان الحفلة بنربطهُ.
أول ما العيد يقرب، زولنا بقول لينا عندي عمتي اتوفت، ح أجِّل موضوع العرس شوية.
بنقول ليه يا حاج عمتك منو؟ إنت نسيت أننا أهل وليس زملاء مهنة، يعني لو عندك عمة إتوفت الخبر بيصلنا قبلك.
بقول لينا إنتوا بتعرفوا عماتي أكتر مني.. بنسكت، عاد نقول شنو؟ وبنمشي نلغي الحجز.
مرة جابوا لينا خبر، قالوا لينا الزول دا المرة دي جادي، ختة الحنة في إيدو.
إتلملمنا ومشينا عليه لقيناه قاعد محنن، والزعل عاوز يشرطو، قبل ما نبشر فيه، التلفون ضرب، قالوا ليه عمتك (السريرة بنت خجر) اتوفت.. زولكم ما صدق نفط الحنة من إيدو، واتلفت علينا وقال لينا عشان تاني تقعدوا تغالطوا، إن شاء الله كدا تكونوا صدقتوا.
صدقنا ـ عاد نقول شنو؟
رفعنا الساونات ومشينا على المقابر.